Պարաֆիմոզ

Պարաֆիմոզ առաջանում է, եթե ծայրային թլիպը (առնանդամի գլխիկը ծածկող մաշկ) ետ է քաշվում և հնարավոր չի լինում նորից բերել առաջ: Այս իրավիճակում առնանդամի գլխիկը սեղմվում է նեղացած ծայրային թլիպով, որը բերում է առնանդամի գլխիկի արյունահոսքի վատացման և այտուցվածության: Եթե բժշկական միջամտությամբ խնդրին լուծում չի տրվում ապա առնանդամի գլխիկի այտուցը ավելանում է և սնուցումը ավելի է խանգարվում, որը կարող է առաջացնել լուրջ բարդություններ: Պարաֆիմոզը դիտվում է չթլպատված տղամարդկանց մոտ:

Պարաֆիմոզը չպետք է խառնել Ֆիմոզի հետ: Պարաֆիմոզը անհետաձգելի ուրոլոգիական խնդիր է, որի դեպքում պետք է շտապ դիմել բժշկի:

Ինչ գանգատներ են ունենում հիվանդները պարաֆիմոզի ժամանակ ?

Պարամիֆոզի ժամանակ հիվանդը գանագտվում է ծայրային թլիպի իր նորմալ դիրքին բերելու անկարողությունից, առնանդամի գլխիկի այտուցվածությունից, ցավոտությունից: Առնանդամի գլխիկի գույնը կարող է փոխվել մուգ կարմրավուն կամ կապտավուն երանգի, քանի որ արյան շրջանառությունը խանգարվում է:

Որոնք են պարաֆիմոզի առաջացման պատճառները ?

Պարաֆիմոզը մեծամասամբ առաջանում է, եթե ծայրային թլիպը ետ է քաշվում և երկար ժամանակ մնում  է այդ դիրքում:

Պարաֆիմոզի առաջացմանը նպաստում են հետևյալ գործոնները՝

Ծայրային թլիպի նեղացում (ֆիմոզ)

Առնանդամի գլխիկի և թլիպի բորբոքում (բալանոպոստիտ)

Առնանդամի տրավմա

Ինչպես ախտորոշել պարաֆիմոզը ?

Պարաֆիմոզը ախտորոշելու համար անհրաժեշտ է մարմնի զննում, որի ժամանակ կարելի է տեսնել ծայրային թլիպով առնանդամի վզիկի սեղմում, այտուցվածություն:

Ինչ բարդությունների կարող է հանգեցնել պարաֆիմոզը ?

Ինֆեկցիոն բորբոքային բարդություններ

Առնանդամի գլխիկի վնասում

Առնանդամի գանգրենա

Ինչպես է բուժվում պարաֆիմոզը ?

Պարաֆիմոզի կասկածի դեպքում պետք է անհապաղ դիմել ուրոլոգի:

Այս դեպքում հնարավոր է կատարվեն հետևյալ միջամտությունները՝

Առնանդամի գլխիկի մշակում հակաբակտերիալ քսուկով և ներուղղման փորձ:

Սառցեպարկերի տեղադրում առնանդամի շուրջը այտուցը նվազեցնելու համար:

Առնանդամի սեղմող էլաստիկ բինտավորում այտուցը նվազեցնելու նպատակով:

Այս գործողություններից հետո ներուղղման կրկնակի փորձ:

Եթե վերոնշյալ գործողությունները արդյունքի չեն բերում, ապա հնարավոր է կարիք լինի վիրահատական միջամտության՝

Ծայրային թլիպի հատում, առնանդամի գլխիկի ներուղղում, և թլիպի կարում:

Թլպատում, որը կկանխի հետագա պարաֆիմոզների առաջացումը:

Ինչպես կանխել պարաֆիմոզի առաջացումը ?

Ծայրային թլիպը ետ քաշելուց հետո միշտ բերել իր նորմալ դիրքին:

Ետ քաշած դիրքում երկար չթողնել:

Հետևել հիգիենայի կանոններին – օրը գոնե մեկ անգամ ընդունել լոգանք, որի ժամանակ լվանալ նաև առնանդամի գլխիկը:

Առնանդամի գլխիկի կամ ծայրային թլիպի բորբոքման դեպքերում դիմել բժշկի: